Sumando Niniek Mamak

Kali ini penulis akan mencoba menggunakan Bahasa Padang (bahaso urang awak).  Silahkan di simak

Nan kadimukasuik sumando, adolah suami dari kakak atau adiek sudaro laki-laki manuruik kakarabatan Matrilineal di Minangabau. Dulu di Minangkabau ado juo disabuik urang sumando tu sarupo jo abu di ateh tunggua, bisa tabang kanai angin, walau indak kancang. Zaman kini nan sarupo tu indak ado lai, sabab maso lah barubah, urang lah kalua masuak bahkan nan disabuik uraang sumando tadi lah datang dari bamacam daerah dan suku malah ado nan balain bangso. Alhamdulillah, hanyo ciek nan dipaciek arek diganggam taguah dek urang Minang asa jaan balain agamo, bialah asam digunuang, ikan di lauik batamu di balango. Aratinyo kalau memang lah jodoh kito satuju sajo. Karano warih nan dijawek, pusako nan ditolong, siang nan dipatungkek malam nan dipakalang, diindang ditampieh tarek dipilieh atah ciek-ciek nan ugamo urang Minang iyo indak ado lain kacuali ugamo ISLAM. Makonyo kalau samo tajadi ado anak kamanakan nan kawin jo urang nan indak Islam atau inyo bana nan pindah ugamo dari Islam (murtad) sampai kini tatap dibuang sapanjang adaik.

Karano tu mamiliah manantu di Minangkabau memang agak batanang dan hati-hati, indak sajo mancaliek bantuak jo rupo, tapi juo pi’e jo parangai (aklaq) dan nan paliang manantukan iyolah ugamonyo. Sabab itulah sampai kini kalau ka aqad nikah salalu diuji dan ditanyo: lai pandai sumbayang, puaso dan mambaco al-qur’an . Karano malalui nilai-nilai nan sarupo tu kito bisa maliek elok atau indak elok tampangnya, lai urang nan tadidik sikola jo mangaji, lai tau halal jo haram, lai nan mangarati hereng jo gendeng, baso jo basi dan nan suko bagaua dan panyapo (indak mandamuik), sahinggo bisa dipakiroan inyo lai anak nan batangguang jawab dan sayang ka isteri jo anak-anaknyo. Tapi juo pandai bamasarakaik, sahinggo inyo subuah lah ka surau atau musajik, walau sudah tu pai kalapau pulo. Inyo sato bagotong royong, sahilie samudiak jo urang kampuang, capek kaki ringan tangan, arief dan bijaksano. Namun indak maabaikan tangguang jawab ka kamanakan. Inyo sabana ingek sabalun kawin urang gaeknyo lah nan manggadangkan, mambiayai sikola dan mandidik baugamo, Karanotu dibaginyo wakatu dan kasiah sayang sacaro adia, sarupo nan dikatokan “kaluak paku kacang balimbiang, tampuang lenggang lenggokkan, dibao nak urang ka Saruaso. Anak dipangku, kamanakan dibimbiang, urang kampuang dipatenggangkan, dijago nagari jaan binaso”. Sahinggo karano sipaiknyo nan sarupo tu, inyo disagani di rumah isteri dan dihormati dirumah dunsanak. Inyo sungguah-sungguah bausao mangadangkan anak dan mambantu kamanakan.

Mode tabiat nan sarupo itulah nan disauik urang sumando niniek mamak. Aratinyo baik mamak rumah atau bundo kanduang nan ado dipihak isterinyo maraso sanang dan tatolong jo caronyo bagaua, mangecek dan bagurau, inyo indak mamiliah-miliah, nan tuo dimuliakkannyo, nan ketek disayanginyo, nan samo gadang dibaonyo baiyo. Sahinggo kahadirannyo manyanangkan, indak sarupo langau ijau atau kacang miang dan lapiek buruak!. Disuntiang dari tulisan Khatib Pahlawan Kayo

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: